Deputetja e Lidhjes Demokratike të Kosovës (LDK), Valentina Bunjaku thotë se e respekton propozimin e i PDK-së për kandidaturën e Bedri Hamzës për kryeministër.

Por sipas saj, kreu i LDK-së, Lumir Abdixhiku është zgjedhja e duhur për Kosovën.

“Vlerësoj si serioze por mendoj që kryetari i LDK z. Lumir Abdixhiku është zgjidhja më e duhur për Kosovën në qeverinë e ardhshme. Vendi ynë tanimë kërkon profil të një kryeministri të ri e pragmatik, tipare që i posedon në plotni z.Abdixhiku”, shprehet deputetja për Arbresh.info

Kryetari i Partisë Demokratike të Kosovës, Memli Krasniqi të mërkurën ka njoftuar se Bedri Hamza do të jetë kandidat i PDK-së për kryeministër të Republikës së Kosovës.

Krasniqi, në një konferencë për media, tha se Hamza është njeriu i duhur për këtë pozitë dhe për kohën në të cilën po kalon Kosova, andaj edhe i ka kërkuar që të marrë këtë përgjegjësi.

Edhe nënkryetarja e PDK-së, Vlora Çitaku e mirëpriti lajmin për propozimin  të Bedri Hamzës për kryeministër të vendit.

Ndryshe, Bedri Hamza është kryetar i Mitrovicës./Arbresh.info/Kujtesë Berisha/